SANG MAESTRO

SANG MAESTRO

(Kagem Rama Ndung)

Udan tangis kang ngguyur ati atis

Kelangan bapa kang nyambang budaya

Ngukir lan ngrenda rasa

Wur pitutur kebak panglipur jujur

Ngumbah manah kang nemahi susah

Ndedawa donga kelangan bapa kang pinuja

Ngayogjakarta dadia tandha

Siji putramu lunga nglelana ing swarga

Ngrontoke ati nuwuhake puji

Ing pangajab bisa mrentulake perjuangane

Nguri-uri kabudayan jawi kang asri peni

Dadi mekaring kembang ing tengah alang-alang

Biru klawuning kutha tandha sungkawa

Susah pinisah marang bapa kang pasrah

Kang tansah mulang warah rakyat sawantah

Dadi tuwuh greget mbangun karep

Saiki mung kari donga kang mili ing lathi

Ngiring tindak marang Hyang Widi

Oh … Pak Ndhung

Negara lan bangsa lesu kelangan

Kutha Ngayogjakarta angluh kapotangan

Aku kang ngenal srana lakon kebak wewayangan

Anannging kabeh lumampah saka kersaning Allah

Mung donga lan pangajabku bisaa tinampa

Lenggah sinewaka kaapit malaikating swarga

Saukura kang bisa cinathet ing karep

“Mlarat tanpa bandha, ananging sugih mitra

Sugih tanpa bandha, nglurug tanpa bala:

Sugeng tindak Pak Ndung …

Kairing kidung-kidung donga adiluhung

Murih ora kesandhung ing mendhung.

                                                A. Sardi

                                                Sampun kapacak ing Mear Sari

                                                10 April 1991