ELING LAN WASPADA

ELING LAN WASPADA

Mbok menawa iki jaman edan

Sapa sing ora ngedan ora keduman

Sapa sing ora ngedan uripe bakal kacingkrangan

Sapa sing ora ngedan, tangeh lamun bisa mangan

Mbok menawa iki jaman pamenthangan

Akeh wong salah kaprah paweh aran

Lor diarani kidul, kidul dituduh lor

Kulan darani wetan, wetan dituduh kulon

Mbok menawa iki jaman walikan

Bapak lali marang anak

Anak wani marang bapak

Ora ana undha lan usuk

Mbok menawa iki jaman kalabendhu

Suci dianggep saru, saru dianggep suci

Ra ana maneh wong ngakoni anane Gusti

Kabeh ngegungake dhiri

(o.. manungsa

Eling lan waspadaa

Sepira dawa lan suwene laku nira

Pepuntoning bakal mlebu ing alam liya

Ayo bareng mertobata …..}

A.     Sardi

MUSPRA

MUSPRA

yen ngerti lara dadine
aku trima sumendhe
malah yen bisa ...
bali tumuju asale

nadyan wektu mung sadulu
aku ngrmangsani kleru
wiwit mula ora dakluru
aku nggegegi nafsu

yen ngeri bakal klelep
dakpampet sakabehing karep
aku kudud anteng sedhakep
kitabing jalmi kudu dak kekep

eman....
kabeh wis ilang muspra
oleh getun mung sawetara
aku kudu nyepetake laku ngumbara
ngudi kasucening sukma

PANGILONING ATI

PANGILONING ATI

Adhuh, lae

Aku iki sapa

Tansah kumalungkung nggegegi angga

Ngagungake diri

Mentheng kelek

Gegedhen sirah

Adhuh, lae

Aku iki sapa

Kere ngaku-aku bendara

Bodho ngaku-aku pinter

Semuci suci

Remesik resik

Adhuh,lae

Aku iki sapa

Rumangsa nduweni panguwasa

Kamangka sukma kebak dosa

Cilaka

Muspra

A.     Sardi

PIWELINGKU

PIWELINGKU

yen wis tekan titi wancine
simpenen rasa kangen ing senthonging atimu
nganti tumungkuling kidung pangimpen
mawa cahyaning rembulan kang kebak kasmaran
oncekana makna surasaning rasa
aku weling marang manuk bence
kareben aja duwe karep ngganggu gawe

yen wis tekan titi wancine
aja takon maneh menyang ngendi lakuning cahya srengenge
aja takon maneh menyang ngendi dununging katresnan
kabeh kabuntel ing kacu bludru biru
kang sumimpen ing bantal lemeking turu.

                                                                      A. Sardi

BANJIR

                                            BANJIR

sikil tumancep ing kentheling lendhut
nyawa mancik ing pucuking rambut
datan bisa pemut kapan rinacut
mabur ing alam petenging pedhut

          roning ati wis semplah
          alum kungkuing tirta lambah-lambah
         datan kwagang nggandhul ing pang semplah
         nggegem sukma kang pasrah sumarah

swara titirin dhadha datan mendha
sesambat nggetuni lakuning angga
kang kumalungkung ngrusak bawana
apa isih ana rasa getun bakal dadi tamba ?


                                                       A. Sardi

KOPONGING KAPANG

KOPONGING KAPANG

praupamu kumambang ing tawang
ngawe...
nggege tmibaning asmara
kang sawetara kepranggas wektuning mangsa
kasimpen ing njero dhadha

                                wewayanganmu ndhudhah kapang
                                nggeterake rasa kang ana ing njero dhadha
                                panas kadya kebrongot dahana
                                keplepeg ing peteng pedhuting pega

blegermu katon manjila
kapaes esem kebak pengarem-arem
eman
kabeh burem
kabeh kerem

                                                        A. Sardi

AKU IKI SAPA

AKU IKI SAPA

aku iki sapa ....
akeh mitra padha percaya
akeh kanca padha njaluk donga
kareben uripe katata

             aku iki sapa ....
             raga ora mingsra
             sukma kebak dosa
             ketula-tula
             nelangsa
             muspra

aku iki sapa ....
isih kepareng ngrasakake hawaning donya
isih ginanjar susah lan gumbira
isih kadunungan rasa lan pangrasa.

                                A. Sardi

LILAKNA

LILAKNA

wengi nyimpen wewadi suci
ndhadhal badharing pangimpen
landhunging asmara
duk jaman semana
tangkar ngumbara
miyak padhanging rembulan
kekintrang ngupadi dalam padhang

wengi mbadhar jerit panalangsa
medhot endah penining asmara
menyak rasa nak lan kepenak
paweh dalan padhanging bagaskara
mbuka korining donya
metani akehing dosa
mangertia ....
aku tetep setya.

                                                    A. Sardi