BADHARING PANGIMPEN

BADHARING PANGIMPEN

dhuh Gusti sesembahan kawula
dawa donga ngrerepeh Paduka
nyuwun gungan badharing pangimpen
kang satleraman kumambang ing tawang
kareben badhar kasunyatan
ing margining gesang lan panggesangan

dhuh Gusti papaning pangungsen
raga nglenggena tumiba ing bantala
kasempyok prahara
nalika ngoyak hardaning angga
kasunyatan mung rakitaning pangimpen
meleng-meleng miyang pepeteng
pundi katuduhaken lembaring pranyatan

dhuh Gusti pangoning kawula
mugi mawa tekening panguwasa
kersaa paring pitedah kang endah
dimen cetha trewaca ngonceki
maknaning sumpena kang kaya-kaya ana

                                                  A. Sardi

ING GISIK PESISIR

ING PINGIRING PESISIR

cahyaning rembulan katon manjila
ngebaki jembaring segara katon ngegla
miyak watu karang kang rumangsa angkara
njedhul ing grumbul gumuking angga

saka pecahing ombak kang ambyar
mung saklebatan ilang ing gisik anyar
nundhung manuk-manuk manyar kang nyasar
kang rumangsa kelangan papan ing jagad jembar

aku ngupaya nakoni awakku
kang mbegegeg nggeduni laku
niba nangi kesandhung watu
ngluru kanikmataning kalbu

raga iki sejatine wis ringkih
nyeraki swasana endah kang asih
ngedohi kekarepaning pamrih
ngapa aku isih nlesih ?

                                                A. Sardi