NGLELIMBANG

NGLELIMBANG

Wengi kang kebak ing tangis

Pinantek lintang-lintang abyor

Tumiba siji-siji bareng tumetesing ebun

Nyawiji sesaji marang kang murbeng jati

Ginagas gagas laku kang tan waras

Tineling-eling nasib urip kang aking

Duk nalika kekipu ing amis bacin

Dak silakake mripat

Sedya oncat ….

Nggegulang ngelmi kawruhing jalmi

Dak takokake ing wengi

Ing ngendi jatining dhiri

Dak goleki ing tengahing impi

Apa maknaning dhiri.

                                    A. Sardi

                                    Sampun kapacak ing Djaka Lodang

                                    Sabtu Legi, 9 Desember 1989

DALANING LAKU

DALANING LAKU

Dalaning laku pepindhane garis lempeng

Alus rata datan ana sambekala

Tan ana pepalang lan rubeda

Mung kari anggone ngrasa

Dalaning laku iki wis trewaca ngegla

Sauger cekelan teken tekening kalbu

Lelandhesan iman kang sabar lan tawakal

Nadyan kasempyok mayuta godha lan memala

Dalaning laku iki sejatine mung siji

Kabeh tumuju ing pungkasaning pati

Mung kapan tekane ora dimangerti

Mula ayo cecawis dhiri.

                                    A. Sardi

DATAN KEGUH

DATAN KEGUH 

lakuning laku iki
manther tumuju panjer siji
datan keguh ing prasetyaning janji
nedya ngugemi
nedya nyrati
nedya ngopeni

pandelenging panyawang iki
datan nolah-noleh nggolek pikoleh
mung tumuju mring titik kang mligi
netepi janji suci

yen sliramu isih keguh
dak anggep bumbuning kawruh
ngrengkuh nak kepenaking wanuh
aku pasrah sumarah
aku ngalah.
                                                      A. Sardi

TEGUHING ATI

TEGUHING ATI

Dak olak-alik kitabing agesang

Ing ngendi tinemu udining adi

Sedya dak simpen bareng rerepen impen

Kinidung sunar kang mekar mbabar

Siji-siji kaprungu swara asmara

Ginawa angin lan kasirep wengining wengi

Ilang ing pinggiring awang-awang

Rungokna tangising ati

Golekana maknaning janji suci

Sineksen kedheping lintang

Lan angslupe rembulan

Apa ya tega ninggal pun kakang

Kang tan kendhat gumeleng mesu kasmaran

Ngoncati prajanji kang wus tumali

Sedya mlayu tekan ngendi, yayi ….

Bakal dak oyak dumugining pati

Ati iki wis teles kebak pengarep-arep peni

Lara menawa tan bisa nggayuh pangrengkuh luh.

                                                A. Sardi

                                                Sampun kapacak ing Djaka Lodang

                                                Sabtu Pon, 16 Desember 1989

JATINING DHIRI

JATINING DHIRI

I

Ing pojok kamar putih

Dak temokake ayangane dhiri

Ndak suwir-suwir

Ndak entha-entha

Memba-memba kaya satriya madukara

II

Ayangan biru mlayu ing pinggiring tlaga biru

Ngilo mring toyaning agesang

Lucu

Tinemu cacat ireng ngregeti kalbu

Kebak siuang lan taring brangasan

Mratandhani gesang kebak kanistthan

III

Ayang kasangsaran

Mrambat-mrambat munggah redi kadosan

Nedya nantan paukuman kang kasandhang

Embuh kapan

Bakal ndak temokake kabecikan

Bakal ndak temokake kasucian

Kabeh bakal ndak takokake ing ayanganing dhiri.

                                    A. Sardi

                                    Sampun kapacak ing Djaka Lodang

                                    Sabtu Pon, 16 Desember 1989

GRAITAKU

GRAITAKU

Dhiajeng …..

Apa kang wis kita graita

Apa kang wis kita renda

Tawurna ing dhuwuring agesang

Nedya gawanen ing tengah-tengahing impi

Udharana mawa kekidungan asmara

Dhiajeng …..

Wengi iki kebak aruming setya janji

Kang kinukir nalika lelangen ing gisik pesisir

Atiku lan atimu tineken dadi siji

Sesaji nyawiji urip sejati

Dhiajeng …..

Ilangan irenge pedhut

Mawa esem gumbira kang lana

Minangka sangu tekaning kebuntel lena

Ambyur ing alam kubur

                                                A. Sardi

                                                Sampun kapacak ing Djaka Lodang

                                                Sabtu Pon, 16 Desember 1989