NASIB

           NASIB

(swaraning kedhung amba)

Delengen …

Aku kang kecemplung kedhung

Datan oleh pitulung malah kapenthung

Sedyaku bakal unjal napas mentas

Ananging sewu tanganmu tansah ngreridhu laku

Nuthuk mawa palu nepsu

Aku ora bisa nuntasake laku

Mandheg greg gojag-gajeg

Kapan kowe bakal aweh palenggahan

Kapan kekarepanku bakal pinapan

Dene isih ana tangan setan brangasan

Sedya njegal laku tengah kasangsaran

(manuta kanca tatananing nagara

Ing tembe bakal mentas saka sengsara

Nunggal sawiji ing suwiwining pancasila)

                                    A. Sardi

                                    Sampun kapacak ing Djaka Lodang

                                    Sabtu Wage, 17 Maret 1990