NGENDI DUNUNGE

NGENDI DUNUNGE

ngendi dak udi wadining wengi
kanggo nglerem ati kang adhem ayem
dene donya wus kinonggreh mangsa
kebak candhala murka lan duraka

            (lingsir angin ngganda bacin
             ilining toya ngemu bebaya
             nyumpel ati kang sumpeg)


     ngendi papan raga kinubur siti
     kabeg nggendhong gedhong magrong-magrong
     nutup endahing ardi kang suci

             (manuk-manuk jlantri
              aja takon ngendi pencokaning dhiri
              aja takon ilanging kabudayan wingi)

                                                                                                         A.Sardi
                                                                                                         sampun kapacak ing Djaka Lodang
                                                                                                         5 Agustus 1995

KABAR SAKA PASAR

KABAR SAKA PASAR

I
ujare baul godhong
rejeki iki nyelaki pati
plastik lan dluwang nedya mbuntel ati
nadyan kabesut kaya alusing dhadha
kabeh tetep muspra

             II
             kandhane bakul areng
             urip iki mung nemu irenging peteng
             gas elpigi tansah nyeprot bathi
             ngobong lakuning urip kang tansah kajepit

                              III
                              panggrantese bakul bumbon rajangan
                              kang tanpa daya nandhingi iklan bumbu masakan
                              rasa sedhep mateni krenteging karep
                              mancing-mancing nambahi gething


                                                                                              A.Sardi
                                                                                              wis nate kapacak ing Djaka Lodang
                                                                                              16 September 1995

KAPANG KANG KOPONG

KAPANG KANG KOPONG

dak tutup hawaning kamurkan 

saka bolongan pitu regoling kalbu

ngadhep keblating keblat papat

sikil nggedrug bantala kaping telu

nedya nyebut bapa ibu pertiwiku

mbukak tapak dlamakaning tangan

nyadhong tumetesing bun-bun pasucen

nyebar sewuning arum kembang setaman

nyipta peganing dupa pralambanging dosa

ngisi ati kopong mring kapang

marang rembulan kang sugih pangadilan

marang rembulan kang nyimpen rasa kamanungsan

marang dawaning wengi kang ngemu adi

nanging gambaraning ati ngrujit pati

datan bisa ngebaki kapang kang kopong.

                                                      A. Sardi

                                       sampun kapacak ing Djaka Lodang

14 Oktober 1995

GURIT ILINING ANGIN

GURIT ILINING ANGIN

Kabar apa manek kang kok gawa

Dene mangsa konggreh omah obahmu

Nggeterake ati kumitir getir

Mili katut ilining lakumu

        Crita apa maneh kang bakal kok babar

        Kembange ati iki katut alum lan rontog

        Sadurunge megar nyebar aruming rasa

        Kang dawa lelana ngudi begja

Lakon sandiwara apa maneh kang manjila

Kamangka donya kebak pakeliraning manungsa

Andon panguwasa lan prakosa

Apa lakuku uga katut lakumu ?

                                                          a.sardi

                                                          sampun kapacak ing Djaka Lodang

                                                          26 Nopember 1995

TALINING ATI

TALINING ATI

kajiret maneh jagading angga
kasrimpet maneh obahing pengarep-arep
punthes pepes tiba ing apes
karep iki buntet lan bundhet

        kabuntel maneh ing rasa anyel
        kacencang maneh ing kapang-kapang biru
        datan bisa uwal saka cekelan
        datan bisa ucul lan thukul

               tali-tali mati kenceng tumali
               angel diuculi
               angel diuwali
               angel diudhari
               apa kudu nyranti tumekaning pati ?

                                                                                  A. Sardi
                                                                                  wis kapacak ing majalah Djaka Lodang
                                                                                  26 November 1995

BANJIR BANDHANG

                BANJIR BANDHANG

udan iki luh tangising dewa
thathit gludhug iku pasambate kang lara
kabeh nedya tumiba ing donya
manungsa kang nampa

gunung gundhul iku trekahing manungsa
jitir banjir iku minangka pratanda
owa gingsire manungsa duraka
manungsa kang nampa

kenthong titir iku kamulyan
ndhodhog ati lan pikir enggala mikir
nglelimbang tumapaking banjir
kanepsning dewa nedya gingsir

noleh mring korban banjir iku pikoleh
nulung mring korban banjir iku untung
ngrangkul mring korban banjir iku tumungkul
ndonga mring korban banjir iku pinuja

                                                                  A. Sardi
                                                                  sampun kapacak ing Majalah Djaka Lodang
                                                                  23 Desember 1995  

TEMBANG KLARAS GODHONG GEDHANG

TEMBANG KLARAS GODHONG GEDHANG

angin wengi mili nggawa wadi
ngelingake duk jaman kawuri
raga isih ginanda arum wangi
bisa macak lan nguri-uri dhiri

  kasempyok cahya cumlorot ngebaki ati
  dhadha sumIlak nantang wewadi
  lambe tipis binangis tanpa tinali
  paweh panggodha para priyayi

    nanging saiki .....
    klaras godhong gedhang sengkleh kumlarah
    datan tinulungan nadyan mangsa salah
    atine wirang tansah dicecamah

      klaras godhong gedhang kumambang
      sewu rasa kapang wis ilang
      lulur kembang setaman wis ora nglambrang
      nggetuni laku kang keplantrang

                                                        A. Sardi
                                                        wis kapacak ing Majalah Djaka Lodang
                                                        22 Maret 2008

LARA ATI

LARA ATI

yen sliramu kelaran ati
tumujua ing pinggiiring tlaga dhiri
anguk-anguka ing cahyaning tirta
metanana rasa njeroning dhadha

yen sliramu kesenggol ati
lumebua menyang gua kamulyan jati
semedia lan kidungna donga pasuci
kanggo ndhedhes ala lan peni

yen sliramu kabotan sanggan
cekelana teken lakuning kalbu
kareben kasil nuduhake arahing laku
tumuju luweng peteng kang lana

ING TENGAHING WENGI

ING TENGAHING WENGI

ati sepi ing kapang 

kelangan pang lan pencokan

ngendi dununging sangkan paran

yen kekarepanku nglambrang

sedyane ..

ing tengahing wengi

nedya dakrakit pangimpi-impi peni

nanging

lakuning wengi mrambat nyala wadi

malah ngumbar wewadi 

sepi

ing tengahing wengi

ana seklamit ukara rasaning ati

dadi kidung pandonga dawa

dhuh dewa ...

ilangana klilipe angga

ing njero dhadha

a.sardi

LAKUNING LAKU

LAKUNING LAKU

lakuning laku iki

kadya ron aking

kabur kumleyan

tanpa paran

tanpa kaampingan

lakuning laku iki

kadya ilining rina lan wengi

lir gumanti

datan bisa dimangerteni

kapan teka lan dipungkasi

lakuning laku iki

kadya uruping geni

madhangi

medeni

pati

TATUNING ATI

TATUNING ATI

yen sliramu kelaran ati

lumakua tumuju pinggiring tlaga dhiri

ngiloa rupa ing tiyaning suci

kareben kasil nemu lelakon peni

yen sliramu kesenggol ati

lumebua ing gua pasucen adi

kidungna donga puji 

kareben bisa milah lan milih aji

yen sliramu kapunthes ati

aja pisan-pisan nglari

bukaken kitabing jalmi

:pasrah dhiri

                                        A. Sardi

SWARANING RASA

SWARANING RASA

embuh wis kaping pira
embuh wis pirang mangsa
rasa rasaning rasa rinakit dadi kandha
tinampa ngegla mring pramitra

embuh wis pirang pocap
embuh wis pirang tancep
crita iki lumaku saben babak
saiki ilang muspra


                                                                                       A.Sardi