Marutaning Mala

MARUTANING MALA

Tanpa kinyana lan kinira

Tanpa kandha lan crita

Sliramu teka ndhadhal kahananing donya

Menggas tatananing laku jlantraning mangsa

           

Ngamuk pungung datan paweh petung

Mring janma kang sesambat nyuwun tulung

Ngrasa urip kaya katundhung

Ngupaya slamet malah cumemplung kedhung

Marutaning mangsa ngganda memala

Kumrosak datan bisa kinyanak

Tega temen misahake jiwa lan raga

Apa iki kabeh tandha paukumaning dosa ?

A.Sardi – Grogol

Ukaraning Rasa

UKURANING RASA

                        ( I )

                        Dudu dhuwuring arga

                        Dudu jeroning samodra

                        Nanging

                        Rasa rasaning tresna

                        Kang binuka nadyan datan cinarita

                        ( II )

                        Dudu kang rinasa panca driya

                        Dudu tumpukaning raja brana

                        Kang dadi ukuraning asmara

                        Nanging

                        Nyawiji nunggaling ati

                        Nganti titi wanci nemahi pati

                        ( III )

                       

                        Dudu pangkat lan drajat

                        Dudu endahing rupa

                        Kang dadi gathukaning jiwa

                        Nanging

                        Rasa rasaning memitra

                        Nganggep kamanungsane manungsa

                                                                                                    A.Sardi

SAMBAT PAMARTOBAT

SAMBAT PAMARTOBAT

aku wis nate janji marang atiku
ora bakal sambat, nadyan rinasa awrat
ora bakal nggresula, nadyan nemahi cilaka
jagad saisine kang dadi seksine
nanging ......
wektu iki kepeksa aku kudu ngucap sambat
marga uripku rumangsa kesrakat
dudu amarga kelangan drajad lan pangkat
dudu amerga aku tumiba ing jagad kang mlarat
nanging ......
aku kang rumangsa kelangan wektu kanggo Gustiku
aku rumangsa adoh lan kadohan ngrungu sabdaNe
tekening pengandelku ilang
rasa-rasane, aku tumiba ing juranging dosa
ora bisa swala
ora bisa apa-apa
bisane mung sambat mertobat.


                                                                A. Sardi

GUMREGAH

         GUMREGAH

        (welinge swargi bapak)

Ndang gumregaha tangi

Aja nganti didhisiki pitik nglari

Kencengna talining ati

Dimen kasil nggayuh rejeki

Ndang tandang karyaa

Wektu iki wis ginandi dina

Enggala cancut tali wanda

Nempil pakaryaning Hyang Kwasa

Ndang manekunga puja

Sang bagaskara wus angslup mega

Pisungsungna sakabehing karya

Kareben korining swarga binuka.

A.Sardi

PANGILONING ATI

PANGILONING ATI

Nadyan rumangsa kabotan panyangga

Aku ra bakal selak lan swala nampa

Jer lakuning urip iki kaya rodha

Isih akeh sing luwih cilaka lan sengsara

Nadyan rumangsa wis ora kuwat

Aku ora bakal ngucap sambat

Reridhu iki laku lakuning tirakat

Isih akeh sing padha kesrakat lan sekarat

Sedyaku ...

Dhuwuring redi bakal dakunggahi

Jeroring jaladri bakal daksilemi

Nanging aku kudu ngelingi dhiri

Sedyaku ...

Jagad bakal dakemperi

Drajad lan pangkat bakal dakupadi

Nanging aku kudu wani ngilo dhiri.

                                                     A.Sardi

ING GISIKING PESISIR

    ING GISIKING PESISIR

Daktemokake alam endahing kabungahan

Gegana sumilak warna putih lan biru

Kang ginambar tanpa mawa japa mantra

Nuduhake agung lan kwasaning asta-Mu

            Dakrungu swara ombaking samodra

            Nadyan tan bisa nampa sarining makna

            Rasaning kalbu banget rinasa puja

            Aku kudu sedheku asung pangalembana

Dakgelar jembaring ati ing gisiking pesisir

Bareng egaring lar manuk-manuk camar

Sinambi manekung nglelimbang lakuning laku

Kasunyatan, aku janma rumangsa cilik lan asor

                                                          A.Sardi

KELADUK WANI KURANG DEDUGA

KELADUK WANI KURANG DEDUGA

ora ngrumangsani yen awak ora kepenak

ora ngrumangsani yen raga wis tuwa

ora ngrumangsani memala bisa tuwuh samangsa-mangsa

ora ngrumangsani kekuataning raga iku winates mring pangrasa

kok keladuk wani kurang deduga

                          saiki ngrumangsana 

                          saiki ngelingana

                          saiki sambata

                          saiki mertobata

                          aja keladuk wani kurang deduga

             yen ketaman lagi rumangsa

             yen wis tumiba lagi krasa

             yen wis lara lagi ndedonga

             yen kasil ndedonga nyalahake wong liya    

             kuwi keladuk wani kurang deduga

                                                                                           A. Sardi

KANGEN

KANGEN

Angin mili saka suwaliking jendhela

Ngganda warta wewayangan kangen

Marang kelangenaning ati kang kedereng

Mesem cumenthel ing tembok watesing ati

Dawaning wektu ndhudhah lelakon lawas

Duk nalika lelangen bareng ngumbar asmara

Driji tumali suket pangiketing prajanji

Datan bisa pinisahake kaya rina lan wengi

Saiki aku rumangsa kijenan

Mbunteli pangrasa tatu laraning sukma

Ngupaya unjal ambegan kang nyesegake dhadha

Sambat ora kuwat winedhar ing pamartobat

                                            Sardi - Grogol

AJA TANKUWATIR

AJA TAN KUWATIR
(kanggo anakku)

lakuning laku iki kaya banyu mili
datan dimangerteni kapan diwiwiti lan dipungkasi
mula dimula
aja ana selembar rasa kuwatir ing njero dhadha
pasrahna mring Hyang Makuwasa

waspadakna
peksi-peksi cilik kang mabur ing nggegana
ora tau ngrasa cuwa lan cilaka
ora tau sambat lan ngudarasa
apa maneh mung prekara sandhang lan boga
bab musprane sukma saka raga wae ora dirasa

delengen
kembang-kembang kangkung kang kumambang
ing tirtaning tlaga  panggesangan
ora nate dandan
ora kapacak endah edining sandhang
ora kaboreh celak gincu abang
tetep ayu
tetep pideksa
tetep nyumunarake rasa
krenteging kabungahan
ora ana secuwil semining kuwatir.

                                                                       A. Sardi

DONGAKU

DONGAKU
(kanggo anakku)

ing tengahing tangising ati
aku ngupaya nyuwun welasing Gusti
dimen diparingi lejaring margi
kanggo sliramu kang durung mangerteni
jati dhiri
wektu tembe mburi
mung mburu lan ngoyak hardaning dhiri
kamangka mangsa iki wis kudune gumanti
ngapa sliramu durung tetep ngakoni
dhuh, Gusti
paringana padhanging Roh Suci
tuduhna dalan kang edi peni
bukakna korining ati
kareben bisa nemu pepadhang jati.

                                 A. Sardi

ING KORI IKI

ING KORI IKI

atiku kopong ngadhang suwe tekamu
kamangka wis telung mangsa kowe nglungani aku
ninggal lara lan tatu kang ngaru biru
kebletheng ing tengahing pepeteng

ing lawanging ati iki
aku sedya setya tuhu ngenteni
nandyan wektu wis lir gumanti
rasa tresna iki wis ngoyot ing ati

panyawangku nglambrang ora karuan
mumbul dhuwur ilang ing geganan
kabur ing panasing srengenge brangasan
apa isih ana turahan rasa katresnan

ing lawanging ati iki
dawa dongaku cumundhuk ing lathi
mili bareng tumetesing bun-bun adi
nelesi rasaning jiwa kang nglari.


                                           A. Sardi

ANGIN WENGI

ANGIN WENGI

Angin wengi teka nggawa pawarta

Kinanthi ganda layon korbaning memala

Tanpa esem

Kebak luhing waspaning dosa

Angluh tan bisa nggayuh endahing rembulan

Tebah-tebah dhadha nggetuni panalangsa

Angin wengi mili lumebu njero ati

Meneng anteng

Raina wus karsa pamitan mring wadining wengi

Ora suwe maneh mancik ing pucuking redi

Sujud sedheku

Pasrah

Angin wengi kaya kelangan ruh

Njthet crita endahing pangimpen

Sumebar ing gunging ombak samodra

Ora bisa swala

Mung kari siji dalaning pepesthen

: pati

                                                A.Sardi

PASRAH (2)

PASRAH
(2)

ing tengahing wengi kang wadi

sukmaku ngganthang nywara sambat sora

eagaku kang wus kepangan mangsa

wiwit saiki muspra tanpa guna

panyawangku

manther tumuju cahya rembulan kang alum

kang kinanthi kedhipe lintang kebak klilip

nambah memala ngupadi papan dunungku

sumiliring angin atis wengi

ngiring pengangenku minggir ing arenging jurang

kareben bisa nemokake sejatine panandhang

aku dipeksa kuwat lan kwagang

swara kewan alasan

ngumandhang paweh rancaking tumapake karep

dikepiye wae aku kudu madhep manteb

napaki wektu sisaning uripku

dhuh, Gusti Allah

aku jejering titah sawantah

mung sadrema lumampah

pasrah

                                                                                                                     A. Sardi

NUNGGU WEKTU

NUNGGU WEKTU

wektu lumaku tanpa jluntru
ngganjel jero dhadha kebak rasa kuciwa
kelangan pangrasa
mung kedereng nesu

wektu terus tumapak ing laku
munthes dawaning uripku
nuntun ing luweng kasangsaran
tanpa winates

wektu suwe lumaku
ngowahi pangrasaku dadi kasepen
nyempal rasa kamanungsan
aku kelangan wektu

                                                          A. Sardi

WEKTU

WEKTU

dakturut lakuning lakumu
dakenut kabeh kekarepanmu
kapan kowe mandheg
kapan kowe sudi mampir njero dhadha

      kowe mranggas lan mangan uripku
      umurku dadi cendhak nyaketi kasangsaran
      nyimpen wewadi crita lelakoning laku
      kapan bisa dakwedharake marang mega

o, wektu kang tansah lumaku
ninggal crita sumimpen ing impen
ora bakal bisa diudhari lan dibaleni
kabeh kangslup ing suwalike mendhunging gunung

      o, wektu kang ilang muspra
      nyimpen mayuta crita suka lan gambira
      karakit dadi gurit alit
      dadi tambane kangen


                                                    A. Sardi
     

DAKTRIMA

DAKTRIMA

mbok menawa mangsa iki paripurna
munthes sedya lan karya kudu narima
amarga kepangan wektu lan kahanan
kang ora bakal teka maneh

nanging...
menawa underaning amarga rasa
seneng lan sengit
sereng lan serik
anyel lan mangkel
mbok menawa sing momong aku ora trima
embuh, kapan tekane
mesthi bakal mrantasi gawe.....

dawa pandongaku kanggo kowe
sing ethok-ethok nulung jebule menthung
sing ndhedher rasa katresnan lamis
sing duwe lambe tipis
sing mripate picek
sing kupinge budheg
sing semuci suci
sing ngorong lan ngelak dhamparing kalungguhan
sing kedanan drajad lan pangkat

embuh kapan ketemu ing tengah regoling laku
...................................


                                                                                         A. Sardi

PASRAH (1)

PASRAH
(1)

dhuh, gusti sangkan paraning dumadi
kawula pasrah sumarah njrebabah ing sanginggile lemah
nggetuni laku lan tumindak salah
nampi cecamah lan pitenah

dhus, gusti papan sambat lan pamartobat
kawula lila legawa karsa paduka
nampa dendha panyiksa tebusane dosa
tanpa swala

                                                                                             a. Sardi

WUS KADOHAN LAKU

WUS KADOHAN LAKU

nalika sikil iki jumangkah ing plataraning keduwung
sliramu malah mbrongot ati, mecah lan nugelake balung
medhot talining katresnan kebak tulusing kabungahan
ndedawa wirang keplantrang kedharang-dharang

nalika ombaking prahara ati mbaka siji mendha
sliramu nyempyok praupaku mawa mayuta wisa
aku kang ngrasa kangen, kepengin lunga ngumbara
tanpa cuwa cecala lan rasa ati gela.

                                                      a. sardi

SEJATINE URIP

SEJATINE URIP

urip iki kayadene laku
ora ngerti paraning tuju
lumaku bareng karo lakuning wektu
padhang lan peteng mesthi tinemu

urip iki saumpama titipan
ora ngerti kapan kapungsan
dipundhut karo sing kagungan
manungsa ora bakal bisa alasan

urip iki ora beda kaya ilining banyu
menyang ngendi bakal keplayu
kamangka datan rinasa raga tambah layu
ing pungkasan bakal lumebu ing kothak kayu

urip iki mung sagebyaring netra
mula aja rumangsa bisa, nanging ngrumangsanana
yen raga lan jiwa kangogonan memalaning dosa
ayo, tirakat lan mertobata ..........

                                                   A. Sardi

AJA DUMEH

AJA DUMEH

aja dumeh sliramu sugih
samubarang raja brana kokdarbeni
omahmu prasasat kaya toko sarwa ana
kabeh bakal ilang muspra
kabeh ora bakal kagawa nalika sirna

aja dumeh sliramu duwe pangkat dhuwur
kabeh wong prasasat bisa koatur
kalungguhanmu ana ing kursi kencana
kaya raja kang duwe panguwasa dawa
elinga, kabeh ora bakal lana
bisa-bisa malah nuwuhake memala

aja dumeh sliramu pinter
bisa-bisa kurang duwe"karkater"
lakumu bakal mubeng kablinger
kalungan dosa kang  mubeng minger
nyebarake ngelmu kang ora bener
tundhone laku ora pener

aja dumeh sliramu kuwat
sakabehing reridhu bisa koruwat
sakabehing memala bisa mlumpat
kecekel ing genggemanmu tanpa rasa tobat
nanging, kabeh bisa oncat
yen sliramu ngendelake:
adigang, adigung, adiguna.

                                                               A. Sardi

NARIMA

NARIMA

urip iki mung sagebyaring netra
embuh kapan bakal ilang
bali menyang asal-usule
ing lemah sawutuhe

                  urip iki mung mampir ngombe
                  durung nganti mari ngelake
                  gusti wus nedya animbali
                  dimen kita marak ngarsane

                                  urip iki mung titipan lumrahe
                                  sawektu-wektu bakal dikersaake sing duwe
                                  banjur kepriye apike awake dhewe
                                  apa nguja laku terus cumeblok ing lendhuting dosa

ayo pasambat diwiti
ayo pamartobat diwiwiti
ngangseg majeng marak gusti
pasrah jiwa lan raga

                                                                              A. Sardi

TAK TUNGGU TEKAMU

TAK TUNGGU TEKAMU

ing sangarepe regol sekolahan
ana rasa kangen cumenthel njero dhadha
luwih-luwih sawise namatakake surya
kang mlaku mrambat ing nggegana
sliramu tetap durung teka

jam kang cumenthel ing tembok
wis nuduhake wektu titi wancine sinau
ora suwe maneh mesthi bel tandha bakal nyuwara
kabeh gumrudug lumebu ing kelas
sliramu tetep durung teka

aku kepeksa ninggal wekas mring kanca
yen mengko ketemu sigaraning atiku
kareben crita wis saabad aku nunggu
kaya nunggoni tumetesing bun raina
sliramu tetep durung teka

sewu pitakonku jumedhul nggubel pikiranku
aku ora kwagang ngrungu piterange guru
wewayangan praupamu manjila ing ngarepku
ngawe-awe sajak nggemesake
sliramu tetep durung teka

                                                     A. Sardi

GURIT KANGGO SIMBOK

GURIT KANGGO SIMBOK

mbok....
sangang sasi sangang dina
aku ana ing guwa garbamu
ora duwe rasa sedhih
ora ngrasakake luwe
anane mung nak lan kepenak
kebak kekidungan donga puja
kareben ing tembeku bisa urip mulya

mbok ....
saiki aku wis rumangsa gedhe
nanging aku durung bisa males katresnanmu
malah kepara
aku asring nggawe laraning atimu
aku tansah nggawe susahmu
nuruti hardaning kanepsonku
nggugu karepku dhewe

mbok ...
dawa pangimpenku
dhuwur panjangka lan gegayuhanku
nedya nggawe bungahing atimu
nedya njunjung dhuwur asmamu
nanging lakuku tansah kesandhung watu
aku tumiba ing dosa
tansah sambat ngaluwara

mbok ...
aku nyuwun dongamu
kareben lakuning uripku nemu kabgjan sewu
kareben simbok tansah ana ing njero atiku
aku tansah ngeling-eling piwelingmu
aku tansah nurut panjalukmu

mbok ...
muga-muga yuswamu dawa
sadawaning pengangen-angenku.

                                                        A. Sardi

KANGEN

KANGEN

rasa asmara iki
prasasat mrambat kanthi rikat
mecaki dalaning lakuku nganti pirang-pirang wektu
ngadhang tekamu ing njero atiku
apa iki jenenge kangen ?

wewayangane praupamu
sajak nggodha lan nglelara atiku
kang keplantrang ing juranging pengangen
apa iki nikmating rasa kangen ?

layang pungkasanmu
isih sumimpen ing sangisore bantal peturonku
pangajabku, dadia pangimpen kang endah
apa bisa nambani laraning kangen ?

gambar fotomu isih cumenthel
ing temboking atiku kang kebrongot asmara
nambahi tatu tatuning panandhanging ati
apa iki sing diarani lara kangen ?

esem manismu isih rinasa ing pengangen
angel dakbusek saka pandeleng
nadyan wektu wis ngganti mangsa
apa iki sawijining endahing kangen ?

                                                                           A. Sardi

GUMUN TENAN AKU

GUMUN TENAN AKU

gumun tenan aku ...
apa iki tandha badharing sasmita
wolak-waliking jaman edan binuka
wong tumindak durjana malah dipuja-puja
lan disubya-subya
diajak gumbira pesta andrawina
kamangka ...
maewu-ewu gulu kajiret
lan katekak kelangan hak

gumun tenan aku ....
para koruptor ing negara iki
wis kabukti  lan kadakwa salah
praupane nuduhake rasa bungah
kabukti nggondhol lan ngeruk dudu darbeke
isih isa-isane mesem
tanpa ana rasa getun
apa maneh keduwung
malah yen perlu ...
kepriye ngupaya selak lan nolak

gumun tenan aku ...
wong nyolong pengaji matrilyun-trilyun
kapatrapan paukuman pirang taun
beda ....
wong sing kepeksa nyolong pohong
amarga kedlarung
ngrasa isine weteng kopong
e..... kadenangan
tanpa disanak tanpa dilarah
malah nampa bogem lan penthung
dipilara nganti tumekaning pralaya

o... dewa pangadilan
jejegna tatanan lan rantamaning angger-angger
wewaler iki kabeh kudu ngenggoni
sapa salah kudu seleh ...

                                                              A. Sardi

KANGEN

KANGEN

(kanggo pacanganku)

rasaning rasa asmara njero dhadha

nyuwara gumleger kaya ombaking samodra

mili kaya sang bayu keplayu ngresiki donya

tansah nggawa warta anyar dawaning pangrasaa

kangen kang cumundhuk ing jiwa

                   surasaning rasa asmara dawa ngumbara

                   ora kwagang rinenda ing dawaning ukara

                   nanging kawetu ing lair kebak mantra lan donga

                   landhung gumantung kaya lintang ing nggegana

                   kapang iki datan bakal ilang, malah ngrembaka

dayaning asmara kang nggeterake jiwa

kaya bagaskara madhangi jagad bawana

tanpa pamrih lan tanpa bebana

andum tresna tanpa rinubeda

kangen iki nedya kabukak nyata

                    lambe iki datan bisa ngumecap kandha

                    beda ing njero dhadha kang kaya angin prahara

                    nedya mbedhal sakabehing paugeraning manungsa

                    kareben bisa ngrengkuh endah penining asmara

                    kapang iki ora bakal ilang salaminya.

                                                                                            A. Sardi 

SEPI ING TENGAHING WENGI

SEPI ING TENGAHING WENGI


pangimpen landhung
badhar malih dadi rasa keduwung
ilang ing tengahing plataran
keplantrang ing pepeteng

           njero ati rinasa kopong
           kelangan maknaning kapang
           katutup petenging pedhut
           lumebu ing sepi tengahing wengi

aku kudu takon sapa
sangkan jluntrunging panalangsa
kang rinenda dawa ing njero dhadha
kasepen ing pangimpen kang sepi

           aku ngupaya kabotan unjal ambegan
           ngrenda ukaraning pandonga
           kang kepranggas ing swaraning kewan wengi
           kasilep klelep ing pengarep-arep

o... sepi ing tengahing wengi
aku keguh lan pakewuh
angluh ngelak ing pangrengkuh
negesi isining impi.


                                                             A. Sardi
   

TAMBA KANGEN

TAMBA KANGEN

entenana sawetara, dhiajeng

rembulan kang ketutup mega

nyimpen cahyaning asmara

kebak pangimpen

entenana sawetara, dhiajeng

kumedheping lintang raina

bakal paweh tandha

tumangkeping rasa

entenana sawetara, dhiajeng

tembang asmaradana 

bakal ngumandhang ing njero dhadha

kangen bakal entuk tamba

entenana sawetara, dhiajeng

peteng iki bakal malih raina

mbuka saweneh isining donya

cetha trewaca 

                                                               A. Sardi

KEPLAYU

KEPLAYU

sawise kabeh ngesokake rahing kanepson
rumangsa mongkok kasil ngoncatake sukmane
karana tombak tumancep ing jajane
kang kawetu mung banyu bening tandha wening

langit pinayungan mendhung kumalungkung
thathit lan bledheg padha tumungkul
jagad dadi coblong tanpa pepadhang
sukma tanpa dosa oncat saka raga

saka gegana kaprungu swara
" ... ya iki PutraKu kang kinasih ..."
wong-wong padha keplayu ngudi rahayu
saka pucuking lathi winetu
" Bener, Panjenengane Putrane Allah !"

                                                          A. Sardi

TUMETESING WASPA

TUMETESING WASPA

wiwit nampa pawarta
bakal ngandhut tanpa patrape manungsa
sliramu tanpa daya lan swala
nampa kanthi rena
nglampahi kanthi suka lila
tanpa nggresula

dalan urip kasunyatan ora buntet
manah bungah malih dadi susah pasrah 
nampa kahanan
narima ing kasunyatan
jabang bayi wohing katresnan
kudu miyos ing kandhang kewan

panandhang iki kasunyatan isih ngumandhang
sliramu ora diakoni minangka jejering ibu
dening jabang bayi kang metu saka guwa garbamu

saya ajur rasaning ati
mrangguli lan meruhi putra ontang-anting diadili
didakwa lan dipilara kaya lumrahe durjana
dipitenah
dicecamah
ewa semono sliramu mung pasrah sumarah

ing sadawaning dalan munggah redi Golgota
sliramu wus kasadan waspa
rasa lan pangrasane atimu remuk tanpa daya
nyekseni tombak njojoh jaja
mustaka kapatrapan makutha lambanging piala
meruhi raga adus rah tanpa daya
 
sliramu kudu mangku jasad putramu
kang kabotan sangga marga dosa-dosaku.

                                                                                          A. Sardi

     

APURANEN AKU

APURANEN AKU

nalika Sliramu didakwa durjana
aku ora kwagang mbela
nalika Sliramu kudu nampa pidana
aku ora bisa mbengokake rasa
nalika Sliramu digawe pangewan-ewan
sepisan maneh, aku ora bisa paweh paseksen

Sliramu kudu nyangga aboting panandhang
mikul kasangsaran kalambang ing pamenthangan
nurut dalan rumpil kebak kasangsaran
nuruti kanepsoning jiwa-jiwa brangasan

apuranen aku.....
amarga dosa-dosaku
nggawe rah tumetes saka mustakaMu
amarga dosa-dosaku
nggawe ragaMu kebak ing tatu
amarga dosa-dosaku
Sliramu kudu seda saka tanganing satru

apuranen aku ....
nalika ragaMu gumantung pamenthangan kayu
aku malah mlayu ......

                                                            A. Sardi

OWAH-OWAHANE JAGAD

OWAH-OWAHANING JAGAD

biyen,
manuk prenjak njanter ngarep omah
paweh tandha tamu bakal teka
sedulur adoh nggawa kabar gumbira
rasa kapang bakal ilang

biyen,
wayah wengi ana kupu putih kekintrang golek padhang
tangan kudu enggal ngelus dhadha
lambe nggedumel kebak ukara donga
gek sapa maneh nedya nampa kabar dhukita ?

saiki,
menyan ngendi swara kumandhanging manuk prenjak
ing ngendi bisa pinanggruli kupu putih kekaplak

                                                                                  A. Sardi

GRIMIS ING WAYAH SORE

GRIMIS ING WAYAH SORE

bener surasaning pangimpen
jroning ati bakal kisenan katresnan
kang wus sawetara wektu dak adhang
kaya nunggu jumedhule watu item saka dhasaring tirta
kaya nunggu kereme baita gabus ing tengahing samodra
kang saiki tinandha dening grimis kang riwis-riwis
banyune nelesi telak kang nglinthing garing
nyumpel sakabehing pangrasa

bener welinge simbok,
yen grimis ing wayah sore mengku prakara gedhe
rasa rumangsa bakal diuji ngrumangsani
dimen dadi suci sakabehing ati
bareng karo angslupe bagaskara
ninggal kapang
kapan tekane wengi.


                                                   A. Sardi-DL. 2-6-2018

REDI GOLGOTA

REDI GOLGOTA

ana raga tanpa daya lan dosa
kudu nampa siksa
kudu nampani dhendha
lan, ngrungkebi panandhanging manungsa
kang keblusuk ing alam kasangsaran
amarga wus kumawani nerak paugeran

ana raga pasrah sumarah tanpa swala 
tan bisa sambat lan nyuwara kanggo mbela
lila dadi bana
gumantung ing salib pangadilan
kanggo nggayuh kamenangan
saka wewengkoning setan jahanan

redi Golgota
papan  panyiksan lan kekejeman
kebak duraka, adoh rasa kamanungsan
bisaa dadi tandha
raga gumantung salib
lila dadi bana kanggo nebus dosaning manungsa.

                                                            A. Sardi

RAGA GINANTUNG ING PAMENTHANGAN

RAGA GINANTUNG ING PAMENTHANGAN

raga ginantung pamenthangan dinakwa ala
nyangga abot panandhanging dosa manungsa
kang wus ngendhon sajroning sukma
ewa semono, Panjenengane datan sambat lan swala
sineksa nganti pungkasaning seda

raga ginantung ing pamenthang
datan bisa nyuwara sambat ngumadhang
mratandhani binukane dalan padhang
nyumingkirake sakabehing pepalang
ngancik ing alam menang

raga ginantung ing pamenthangan
wus datan bisa unjal ambegan
pasrah sumarah dadi bebanan
nebus dhendha lan paukuman
ngrengkuh kamenangan

                                                                               A. Sardi

PALERENAN

PALERENAN


ing sangisore wit trembesi iki
rasa pangrasaku kumlarah tanpa pesthi
kapan tekamu nggawa tambaning ati
kapan endah esemmu cumundhuk ing lagi ?

ing sapinggiring dalan klangenan
sliramu kapan nyungging esem ing lathi
njero dhadha iki wus kepanjingan kapang
kang ora bisa ditambani sadurunge kumambang

                                                    A. Sardi

ING PUNCAKING REDI GOLGOTA

ING PUNCAKING REDI GOLGOTA

raga tanpa doya
sukma tanpa dosa
isih panggah disiksa lan dipilara
isih tambah dicecamah tan tinemah
pasrah
sumarah
gumregah ngrakit ukaraning donga:
"Rama, dhumateng Paduka
kula pasrahaken jiwa lan raga..."

angin prahara
mendhung kumalungkung
paweh tandha
sukma suci oncat saka raga muspra
pungkasaning ukara donga:
"Rama, kenging menapa
Paduka ninggal kula ?"


                                                       A. Sardi

DALAN PAMENTHANGAN

DALAN PAMENTHANGAN

darbe dosa apa  ?
dicekel lan didakwa tumindak murang tata
diadili kaya lumrahe durjana
tanpa seksi lan bukti
tanpa ana kang wani mbelani

darbe salah apa ?
diglandhang lan digawe pangewan-ewan
diblejedi lan digawe wirang
didakwa salah lan dicecamah
malah nganti njrebabah ana lemah

darbe kaluputan apa ?
kudu nampa paukuman lan siksa
mecaki dalan pamenthangan
ngambah dalan rumpil puncaking arga
tanpa ana rasa welas asih

darbe dosa apa ?
raga tanpa daya kebak ludira
disiksa ora kaya lumrahe manungsa
diperjaya  tanpa swala
tanpa ana pangapura

(Gusti, keparenga kawula nggempil
kasangsaran Paduka .......................)

                                                     A. Sardi

TANDHA TANDHANING RASA

TANDHA TANDHANING RASA

ngapa mripat iki sekarat
nyawang wong liya mesem gumuyu
nemu kabungahan lan kabegjan
tanpa timbang ?

ngapa kuping iki njepiping
ngrungu pawarta lakuning asmara
cumundhuk ing anggane wong liya
tanpa cecala ?

ngapa rasa jero dhadha iki cubriya
nemu mitra lelumban ing samodraning gumbira
keplok-kelpok lan jingkrak-jingkrak
tanpa winates ?

ngapa tangan iki nggegem getem
meruhi kanca uwal saka panandhang
lenga ambegan metu saka pakunjaran
nemu kamardikan ?

gusti ....
mugi paringa kawelasan
mugi paringa kamirahan
mugi paringa pepadhang
marang sukma kang nglambrang

                                                    A. Sardi

ING TENGAHING KAPANG

ING TENGAHING KAPANG

ndak dhudhah maneh
cathetan lawas kebak lebu
apa isih tinemu crita-crita lakuning asmara
ing tengahing kapang kang kumambang

ndak piyaki maneh
lempitan buntelaning ati
apa isih ana tapak tilasing rasa tresna
ing tengahing kapang kang brangasan

ndak jumputi maneh
ukaraning tembang-tembang lawas
apa isih ana lagon tangising katresnan
kang sumimpen ing tengahing kapang

ndak pecaki maneh dawaning wektu
bareng lumakuning rembulan ing tengah wengi
apa isih ana tatuning ati
amarga ketriwu ing tengahing kapang ?

                                                    A. Sardi