PEPILING KANGGO ANAKKU
elinga ya ngger ....
bapak-embokmu iki dudu apa-apamu
saka sesambungane asmara kang rinakit rasa
nuwuhake wiji suci
titipane Gusti kang murbeng dumadi
elinga ya ngger ....
bapak-embokmu rumangsa jalma pinilih
dadi lantaran panguwasaNe
dadi srana ngukir jiwa lan raga
ya mung sliramu
elinga ya ngger ....
bapak-embok datan duwe kaya raja brana
duwene mung renda wohing asmara
kang banjur manjilma jalma tan kinira
ya mung sliramu
elinga ya ngger ......
apa kang dadi darbeke bapak-embukmu
ya dadi darbeke sliramu
nanging
durung mesthi apa sing dadi darbekmu
dadi darbeki bapak-embokmu
elinga ya ngger ....
panguwasane bapak-embokmu
mung nuntun jumangkahing laku uripmu
yen wis tekan titi wancine
garising pepesthen
sliramu kudu lumaku ijen
elingga ya ngger ....
dawa dongane bapak-embokmu
linambaran rasa tresna kang tanpa tidha
ewa semono
yen isih kawawas luput, salah lan dosa
apuranen bapak-embokmu
kareben gangsar lakuning laku
marak Sang Hyang Wiku.
A. Sardi
Durung mesthi apa sing dadi darbekmu,Pak Sardi itu artinya apa , Bagus Pratama 7A/11
BalasHapusBagus Pratama ....
BalasHapusTegese: apa sing dadi duweke wong tuwa mesthi dadi duweke anak. Nanging apa kang dadi duweke anak, durung mesthi duweke wong tuwa (Apa yang menjadi miliki orang tua, pasti menjadi milik anak. Tetapi apa yang menjadi milik anak belum tentu menjadi milik orang tua. Bhs. Ind)
Pak, napa tegese jumangkahing laku uripmu?
BalasHapusGupita parahita/7b/17
Gupita .....
Hapusjumangkahing laku uripmu tegese langkah lakune uripmu (Langkah jalan kakimu)
Pak, napa tegese bapak-embok datan duwe kaya raja brana ?
BalasHapusPutri/29/7a
Putri ....
Hapustegese bapak-embok ora duwe kekayaan
Pak napa tegese murbeng dumadi?
BalasHapusFelicia/13/7b
Felicia ,,,
HapusTegese murbeng dumadi yaiku mula buka / wiwitane