PANGLIPUR

PANGLIPUR

Pancen durung titi wancine

Nadyan ngetog daya ngudi karya

Ananging grimising sangsara durung lunga

Entenana sedhele yen wis ganti mangsa

Edhunna ambeganmu kang dawa

Etusna kringet apesmu kang nelangsa

Klasaning katentreman pancen durung gumelar

Isih ngganda dosa kang kita sandhang

Kang samesthine kudu dilelimbang

Nedya diresiki ing sendhang kauripan

Kita ora wajib andarbeni

Kita ora wajib nguwasani

Ananging kita wajib nyrati lan ngopeni

Kita lagi kesandhung ing kasangsaran

Aja sambat lan aja sesipatan

Kudu ditampa kanthi lega lila

Pancen dosa kita kang gawe sengsara

Nutupi gambaraning tresna kang karenda

Sanadyan cetha cumundhuk ing ati kita.

                                                A. Sardi

                                                Sampun kapacak ing Djaka Lodang

                                                Sabtu Legi, 13 April 1991

WELINGKU

WELINGKU

Tunggunen sedhela wae dhiajeng

Aku sumedya reresik ati ala

Kang tansah rumeget kraket ing karep

Bakal dak guwang ing awang-awang

Kareben sirna sipate manungsa

Caturana rembulan kang kawengen

Gugahen lintang raina kang ora daya

Murih ngirengke petenging wengi

Kebak impen-impen wewangen

Aku titip reroncen marang manuk bence

Kangenku kang wutuh mung kanggo kowe

Mung wae dhiajeng ….

Yen ana kupu putih nyedhaki peturon

Suwiwine kekablak sumanak

Tiniten tresnaku ora bisa diajak balen

Malih dadi irenge wengi

Datan bisa nuwuhake impi.

                                                            A. Sardi

                                                            Sampun kapacak ing Djaka Lodang

                                                            Sabtu Legi, 13 April 1991

SETYAKU

SETYAKU

Wilangana pira gatraning ati tresna

Pecakana setyaning ati kebak asmara

Pait getir wus tan rinasa lara

Tandhising pikir kaya jroning segara

Setyaku wus kumambang

Ndak renda lan tinata dadi tembaga

Ngganda arum kaya taman kebak kembang

Apa isih arep dilelimbang ?

Bukakna lawanging ati

Aku sumedya ninggal rasa wigati

Datan selak lan nedya nginggati

Tekan titi wancining pati

Setyaku mung siji

Tresnaku mung nyawiji

Asmaraku bakal nuwuhake wiji

Apa isih arep nolak janji ?

A. Sardi

Sampun kapacak ing Gema Kanisius

Mei 1991

              

WELINGE GUSTI

WELINGE GUSTI

Siji kang keri ing pinggiring ati

Nggubed laku madhep mangu

Oyoting tresna tan bisa diselak diswala

Ngepang malang-malang sadengah papan

Ngebaki ayangan nyundhul gegana

Mung kari ngundhuh wohing prasetya

Sesuk yen mega wus tinarbuga

Sedya ndak pisungsungake resiking ati

Mung mligi kanggo gusti.

                                                A. Sardi

                                                Sampun kapacak ing Gema Kanisius

                                                Mei 1991

SEMEDI

SEMEDI

Ing tengahing sepi wengi

Dakleremake kahanan kadonyan

Sedya semedi sungkem ing ngarsaning Hyang Widi

Nglelimbang lan nggagas lelakuning gesang

Kang sineksen dening sedulur lanang konang

Semburating ati sedya katiti

Mawa sumunaring lintang lan rembulan

Kang tansah cinaket paring penget

Milang kasangsaran lan kadosan

Kang tinandur ora katandur

Manuk bence kang tansah ngece

Atur panuwunku mung marang kowe

Dene aku wis bisa nemokake aku

Aku wis ngerti sadurunge dingerteni

Aku wis tobat sadurunge mertobat

Ya, ing wanci wengi iki.

                                                A. Sardi

                                                Sampun kapacak ing Djaka Lodang

                                                8 Juni 1991