KIDUNG PANGLIMBANG

KIDUNG PANGLIMBANG

wedharna apa kang kinandhut ing rasa
tebar gelaren saambaning ara-ara
nganti tinemu gambaraning pandhita ratu
kareben trewaca endi kang suci lan dosa

      thinthingana isining kalbu
      leremna sumiyuting angin nafsu
      nglulu lan ngluru jembaring samodra biru
      nganti kabeh mitra kaanggep satru

tebah-tebaha dhadha
nggetuni laku lakuning sukma nglegena
mawa pangilon kitabing jalma
takanana: manungsa iku sapa

                                      A. Sardi
                                      Sampun kapacak ing Djaka Lodang
                                      24 Juni 1995