NGUPADI JATI DHIRI

NGUPADI JATI DHIRI

Ora perlu nglumba ing tengahing jaladri

Sebab mung bakal nemu irenging wedhi

Kang bakal ngregeti jagading jalmi

Tan wurung nuwuhake keduwung agung

Ora perlu munggah ing ouncaking ardi

Sebab ing kana mung kari sisaning jalma

Kang tumetes bareng bun-bun tumiba

Bakal ngregeti netra nyandhung karsa

Ora perlu mundhuk-mundhuk kami tuwa

Sebab ing kana mung bakal nemu unthukaaning dupa

Kang bakal ngganda lan nuwuhake hawa murka

Datan bisa aweh tandha ing ngendi dununging swarga

Ora perlu pasa ngrekasa raga

Sebab bakal nyiksa karya kang tan lana

Ngrengkuh penggayuh mawa luh

Datan bisa ngrengkuh wulang reh

Ananing ngupadia ing alaming raga

Kang cumenthel ing pucuking ilat

Ya ing kana bakal nemu abang biruning laku

Gegambaraning laku tansah kawetu

Mula kudu dijaga pucuking ilat

Mula aja nganti ngetokake ukara nglelara

Mangertia jatining dhiri cumundhuk ing lathi

Ora perlu diupadi nanging dipepetri.

                                                A. Sardi

                                                Sampun kapacak ing Djala Lodang

                                                18 Juni 1994