PEKSI-PEKSI SUCI

PEKSI-PEKSI SUCI

Lar-lar megar nyebar kabar

Mbuka ati amrih gumelar

Wektu lumaku datan sabar

Methik kembanging sukma dadi anyar

Oh, peksi-peksi suci

Tulung tuduhna jlantraning ati

Saiki anguk-anguk ing kori

Kang kangen endahing swargi

Yen isih ana wektu

Tetesana ilatku kang kaku

Mawa bun-bun kaluru

Kareben lancar pangucap dongaku.

                                    A. Sardi

PEDHUTING LAKU

PEDHUTING  LAKU

Ireng

Peteng

Nggenthaweng

Nutup kalbu

Ngreridhu laku

            Pedhuting laku

            Kapan bisa kawiyak

            Kapan bisa kabukak

            Aku kadohan sanak

                                    A. Sardi

BAITANING URIP

BAITANING URIP

(refleksi ing tengahe Gilimanuk)

Adoh temen sangkan paraning laku

Kiwa tengen tinemu banyu ngaru biru

Santering maruta ngobahake baita

Lumaku anteng ing sadhuwuring samodra

Ukaraning pitakon manjila

Menyang ngendi lakuning uripku

Yen dhadha sinumpel aboting dosa

Yen raga kapanjingan godha lan memala

Ing sadhuwuring baita jumambang ing Gilimanuk

Sukmaku nedya anguk-anguk raga kang tanpa daya

Apa isih kepareng nunggal samekta

Ngetutake ombak kang sumilak ?

                                                            A. Sardi

BEBENDHU ING BEDHUGUL

BEBENDHU ING BEDHUGUL

Tak enteni tekamu

Sinambi nglempit lambe biru

Ngremet dlamakan tangan tanpa cekelan

Saka ngendi njedhule bebendhu

Dakunggahi dhuwuring gumuk bedhugul

Kareben trewaca mayuta sesawangan

Mripat njelalatan nyawang kebat papat

Kuping ngrungu pamisiking angin adhem

Nanging …

Bebendhu tetep dadi bebendhu

Nggawe kakuning kalbu

Kelangan enggoking laku.

                                                 A. Sardi

ING SADAWANING PESISIR NGLAYAR

ING SADWANING PESISIR NGLAYAR

Aku nate takon marang srengenge

Apa isih ana dina kanggo jiwaku

Ngidungake panandhanging kalbu

Kang kerem ing tengahing samodra biru

Aku nate kandha marang banyuning segara

Menawa swara pawarta ombakmu tanpa guna

Apa maneh kasil ngedhem panasing jiwa

Kang kelu ing prahara

Aku nate ngudarasa marang jembaring pesisir

Ing papan iki bak dakubur dosa-dosaku

Kareben entheng sangganing laku

Marak ing ngarsaNe Gustiku

O … pesisir Nglayar

Aku wis ora kwawa ngadhepi rasa sabar

Aku kepengin kowe enggal mbabar

Kapan klasane sukma bakal ginelar

                                                A. Sardi