KAMAR SUWUNG

KAMAR SUWUNG

Pitulas taun kepungkur

Atine bapak embokmu bungah kaya ketiban ndaru

Pengarep-arepku

Muga kowe bisa dadi panglir lan nambahi daya semangat uripku

Rolas taun kepungkur

Kidung donga kekudangane bapak lan embokmu

Ngumandhang ing pojok-pojok kamar

Enggala mrabat nurut iining jaman

Bisa nyecep ilmu ing pamulangan

Eba bungahing atine bapak lan embokmu

Ing kaca pangilonmu

Wis ana gambar prapamu kang ngemu cahya sumunar

Gedhe pengarep-arepku

Kowe dadi pengarep-areku

Sepuluh taun kepungkur

Bapak lan embokmu kasil nuntun lakumu

Masrahake kekudanganku marang Gustimu

Sawenenh sedulur padha paweh donga panglipur

Paweh panjurung murih lakumu nemu mujur

Limang taun kepungkur

Kowe tansah lungguh ing pangkone bapak lan embokmu

Gegandhulan rasa emoh pinisahake

Bebasan ana bakap embokmu… ya ana kowe

Rong taun kepungkur

Sajake kowe emoh dak gandheng

Emoh nyandhing bapak lan embokmu

Nanging aku ngerti …

Kowe ora daya tanpa bapak lan embokmu

Apa-apa sarwa sambat

Eman, kowe durung bisa ngrumat gegayuhanmu

Saiki …

Kowe wani nglari

Nglungani bapak lan embokmu nenepi

Kebak pengarep-arep

Nunggu balimu

Kang tanpa tuju

Saiki…

Kamarmu suwung

Kaya kasepen ing impen

Prasasat

Kamarmu mung dadi susuhmu

Cukup mung kanggo turu

Kala mangsane kowe rumangsa eling

Saiki …

 Aku kangen kowe gelem gegojegan

Kaya nalika dolanan jejaranan

Kaya nalika nembang lagu dolanan

a. sardi