RON-RON AKING

RON-RON AKING

Lakuning urip ngupaya nenepi

Ngupaya ngonceki jatining dhiri

Ngupaya miyak wewadi

Ngapa jiwa manjing ing raga

Nanging tanpa ana rega pengaji

Kaya ron-ron aking

Kabur kumleyang tanpa pepesthen

Katur ing mobah mosiking ing mangsa ketiga

Tan bisa miyak panasing hawa

Keli ing ombyaking jaman edan

Kadohan sangkan paran

Kebletheng ing dalan peteng ireng

Kabotan sesanggan

Kelangan papan pencokan

Kadohan rasa sambat lan pamartobat

Kecemplung ing luweng keduwung

Kari nunggu wektu

Kapan ron-roning jiwa pinisah ing raga ?

                                    A. Sardi