PESISIR TANJUNG BENOA

PESISIR TANJUNG BENOA

Tanjung Benoa ….

Aku kepeksa ngelap waspa

Kang ndlewer tanpa rinasa

Tandha lambanging ati ngumbara

Kasempyok angin lan ombak prahara

Tanjung Benoa ….

Aku kepeksa ngelus dhadha

Meruhi ewon pasir cacahing dosa

Kaya watu karang kang angker prakosa

Tanjung Benoa

Tuduhna sumbering kiblat papat

Aku nedya manembah srengenge

Aku nedya cecaturan karo rembulan

Aku nedya takon karo ombak

Aku nedya ndedonga bareng watu karang

Aku nedya ngeburake pengangen-angenku

Ing sadhuwuring samodramu.

                                                A. Sardi