NALIKA SURYA LINGSIR MANGULON

NALIKA SURYA LINGSIR MANGULON

Nalika surya lingsir mangulon

Aku kelingan gathuke gegantilaning ati

Ngrembaka kaya tuwuhing pandhan ing gisik segara

Datan oreg dening pangamuking prahara

Nalika surya lingsir mangulon

Bareng karo aburing manuk camar sajodho

Munggah mudhun nata obahing donya

Datan miris sanadyanta nemahi wengis

Nalika surya lingsir mangulon

Ndak tawurake wedhi ing ati

Minangka tandha lan seksi janji suci

Ora wola-wali tan teguh ing janji

Nalika surya lingsir mangulon

Cancutna karsa uwal saka karya

Iki wanci kanggo gusti

Kang medhot ananing awan lan wengi.

                                    A. Sardi

                                    Sampun kapacak ing Djaka Lodang

                                    Sabtu Kliwon, 25 Agustus 1990