WEDHAR JANJI

WEDHAR JANJI

Dhiajeng …..

Resepna ing ati rumasuking pedhut raina

Kang tansah ndedawa donga luwar saka lapa

Sedya ninggal weling mring kahanan aking

Siji kang dititipake ing ron-rong garing

Wus kawarta ing ocehing peksi-peksi jlantri

Dhiajeng …..

Menawa nyawang kembang ing taman

Tuwuh kangenku mawantu-wantu

Kang wus kasimpen mawindu-windu

Datan kinesok kaya grimising kaliurang-ku

Iki pepiling kang gumeling lan ndak sandhing

Dhiajeng …..

Yen entuk palilahmu lan kekudanganmu

Wengi iki duwekmu lan duwekku

Pedhut iki kemulmu lan kemulku

Angin ingin napasmu lan napasku

Gunung iki tetengermu lan tetengerku

Ayo dicandhak bebarengan.

                                                            A. Sardi

                                                            Sampun kapacak ing Djaka Lodang

                                                            Sabtu Wage, 26 Januari 1991