SABAR

S A B A R

jare simbah
ati sabar iku dhuwur wekasane
malah yen bisa
digulung lan digelar
kareben kabeh bisa kelar

sanadyanta
kaya ngenteni kereme prau gabus
lan kaya ngadhang timbule watu item
lakuning laku aja kasar
mundhak kesasar

urip pancen kudu sabar
nadyan nampa pandakwa ala
nadyan dipaeka lan dipiala
katemah kudu nemu pilara
nanging iku mung sedhela

urip pancen kudu sabar
bebasan kaya rodha manggilingan
ing titi wancine
bakal nemahi parigawe
bakal nemoni sunare srengenge
bakal nyucup beninge bun-bun suci
bakal nyecep hawaning kamulyan
bakal meruhi dalan padhang
bakal ngrasa pangimpen kang edi peni
bakal mesem gumbira

wis daksrantekake
aku nedya ngenteni tekane
sinambi ngidung donga ing ngarsaNe
muga-muga entuk palilahe
aku nedya sumendhe

nadyan sabar ora kinira watese
pengandelku tansah nguwatake
jejeging lakuku ngambah pituduhe
ngancik ing kori palenggahanNe

siji panyuwunku:
paringana kuwat aku.....

                                                     A. Sardi