UWUH

UWUH

Ing pojok kana isih ana setumpuk

Siji-siji kabur arusing jaman edan

Nggawa ganda rumesep tekaning jiwa

Kesampar kesandhung nambahi keduwung

Ing pojok kana isih ana secuwil

Rumaket kenthel ngrusak edining jati

N ggugah niat rasa memungsuhan

Isih ana kang ndedawa wirang

Menthang-menthang ngajak perang

Rumangsa adigang-adigung-adiguna

Saka kekadohan sinawang

Dudu uwuh

Rupa lan bentuke apik resik

Katlusur isi lan jerone

Uwuh

Aku

Kowe kita kabeh kalebu uwuhing pranataning mangsa

Kang kadhedher marga nafsuning duraka

Pingin ngreksa apa kang ana

Malah ngruda tali peksa

Uwuh kang tuwuh ing kawruh

Nggeterake nambah-nambahi kisruh

Tan kabrasta tetep wanuh

Uwuh

Ing kana ana

Ing kene ana

Ing kana ngumbara

Sapa kang kuwasa mbrasta ?

                                                A. Sardi

                                                Sampun kapacak ing Djaka Lodang

                                                Sabtu Pon, 16 Maret 1991