TULISANING ATI

TULISANING ATI

Eja lan wacanen tulisaning ati

Yen nemu begja, aja banget nggone gumbira

Yen nemu cilaka, aja banget nggone sengsara

Waspadakna, urip iki kaya ubenging rodha

Wacanen tulisaning ati kanthi permati

Siji-siji wilahen salah lan dosa kang wis dilakoni

Klumpukna laku amal kasaenan kang kepalang

Aja tidha, sedheku lan ngupaya ndonga

Tulisan ati cetha trewaca

Kadhang susah – kadhang bungah

Kadhang urip – kadhang mati

Kadhang cilaka – kadhang begja

Kadhang cendhak – kadhang dawa

Kadhang tetep – kadhang ora ajeg

Mula ….

Ati kudu asring ditulisi kanthi taliti

Mawa donga pamuji marang Gusti

Dimen nemu padhanging dalan

Aja malah nglari lan lumebu ing pati

Kang tanpa tali kekuataning iman.

Tulisaning ati kudu mili

Nurut laku japra mantrane toya suci

Ora perlu salah tunjang rebut dhucung

Ora perlu suk-sukan kaya rebutan balung

Ora perlu nggege mangsa sadurunge tumiba

Wis disranta kanthi tetep memuja.

                                                A. Sardi