LELAKON SAJRONING LAKU

LELAKON SAJRONING LAKU

Ora nyana

Ora ngira

Ora nduga

Pranyata ing tengahing laku ana satru

Kang ngupaya mbujuk daya ngajak ambruk

Ing sajroning laku

Ana rasa susah ing tengaing bungah

Ana rasa bunga ing tengahing susah

Ing sajroning laku

Sawenenh rasa dosa luntur ing keduwung

Gegayuhaning pengarep-arep tetep landhung

Ing sajroning laku

Dak klumpukake rasa kapangku kang sumebar

Nedya dak wedharake marang cahyaning rembulan

                                                            A. Sardi

REGOLING KAPANG

REGOLING KAPANG

Ing papan iki

Aku ngupaya ngoyak tamba

Laraning kapang kang pirang-pirang mangsa kapiran

Ambles ing bang wetan

Katriwu mring jumedhule suryaning donya

Ing papan iki

Dak adhang tekamu

Nedya dak icipi manising esemmu

Kang ginambar ing pedhut-pedhut klawu

Ing papan iki

Dak gambar surasaning atiku

Kang kumleyang bareng tumetesing bun-bun injing

Cumenthel ing pucuking suket alang-alang

Ing papan iki

Dak  udi tambaning ati

Kebak tatu ngaru biru suwe ora tinemu

Keplayu mburu nafsu ngoyak satru

Regoling ati kapang

Dadia tandha pitemonan suci

Dadia tetenger wedharing prajanji

Driji tumali dadi siji

                                                            A. Sardi

SANGKAN PARANING DUMADI

SANGKAN PARANING DUMADI

Angin wengi nggremet njenjem caos tandha

Iki mangsane urip kudu lir gumanti

Biyen dudu saiki, saiki wis dudu biyen

Ana titi wancine meneng anteng semedi

Nliti

Nggetuni

Jluntrunge laku kang kaluru kleru

Ketekuk kablusuk

Ngudi umuk

Sairing lumakuning wektu

Umur wis kliwat setengah abad

Jumangkahing sikil wis adoh

Surasaning rasa wus dawa ngaluwara

Raga prasasat wus kasadan luh lan kringet

Wis wancine kudu leren

Sumendhe ing palerepan

Ngadhang pepadhang tandha tinimbalan

Sinambi pasrah sumarah

Mawa kidung donga pepudyan

Sangkan paraning gesang wis ginaris

Ing antarane urip lan mati.

                                                A. Sardi

ISINING ATI

ISINING ATI

Pambengoking rasa

Rasa rasaning ati jero dhadha

Rasa dosa lan duraka

Rasa kumawani lan mangisor

Rasa pasrah lan panantang

:

Kidung lan donga

Ing lakuning pangumbara

Ngupadi jatining dhiri

:

Ngumandhanging sukma

Nalika adoh saka gusti

Nalika wedi lan sepi

Nalika urip lan mati

Nalika pitemonan lan pepisahan

:

Dalan

Wiwitan lan pungkasan

                        A. Sardi

ING SUWALIKING CENDHELA KACA

ING SUWALIKING CENDHELA KACA

Cahyamu trewaca ngegla

Nyebar esem gumbira kebak makna

Ngawe-awe ati kang lagi nandhang kapang

Kepengin ambyur ing samodraning asmara

Duk lagi karenda ing sapinggiring tlaga

Ana kekancingan kang ora bisa ilang

            Cahyamu kang malih semburat klawu

            Nlesep ing suwaliking mega ireng

            Nyidhem rasa kangen kang kadereng

            Ndhudhah pangimpen impen kasepen

            Apa sliramu bisa nuduhake jluntrunge laku

            Ngambah ing puncak pucuking kalbu

Cahyamu medharake sabda klawu

Nggawe grantesing asmara kang lumaku

Miyak pepeteng

Mbukak kangen

Kang saiki ilang ing pinggiring wengi

Kapan bisa tak cicipi bungahing ati

Yen sliramu tansah ninggal janji

Nguculi tali kang nggubet ing driji ?

                                                            A. Sardi