JOGKA KEMBALI

JOGJA KEMBALI

I

Sumiyuting angin wengi kasirep mawa betenging aji

Nambahi kencenging daya lan karya mulya

Marang bangsa tumindak ankara murka

Kang wus nglenggena meres sarinining gesang jalma

            Sunare lintang raina

            Sumebar madhangi laku lakuning jati

            Mantep, madhep, marep ngrebut “Jogja Kembali”

II

Tetembangane manuk guweg

Siji-siji ilang bareng swara anteping sepatu ABRI

Mratandhani tan ana jalma mati ing palagan jati

III

Ijoning gegodhongan tan wus sinawang

Kebeh ndedonga murih kabuling biat mulya

Marang satru kang ngumbara napsu

Nak kepenak ngidak hak

Ngumbar laku kasar nyasar

Meres

Apes

Tumpes.

IV

Sesautan swara jago kluruk esuk

Ngomandho saiyeg saeka praya

Ngencengake niat kan tan asat

Nyancutake janji sejati ngrebut “Jogja Kembali”

V

Esuk repet-repet pepet

Sinawang cahyaning kringet apes

Ngetog daya kersa merjaya duraka nistha

Sesambungan tan pedhot lan kendhat

Kekipu mimis sesliweran nyucuk nyawa.

                                                A. Sardi

                                                Sampun kapacak ing Djaka Lodang

                                                Sabtu Pahing, 3 Juni 1989