NATAL

NATAL

(kagem dhik Agnes S)

Dirungokna, dhiajeng

Loncenging swarga wus tumalu

Swarane ndhodhog ati kang sepi

Pratandha kawiwitane jagad anyar wus mekar

Sawangen endahing lintang raina, dhiajeng

Sunare ngebaki donya kang lega

Ngemu tandha rawuhining Panebus kita

Kang bakal nebus dosa-dosa kita

Ngengidunga, dhiajeng

Aweh paseksen lan atur pari suka

Dene Pangeran wis njelma dadi manungsa

Bakal nglebur manah kang lagi susah

Bakal numpes ati kang lagi apes

Bakal brastha tumindak murang tata lan duraka

Bakal nglawan kasangsaran

Semedi lan sedhekua, dhiajeng

Luluh leburen ati mangkel

Aturna sembah pangalembana

Dene Panjenengane rawuh nunggal kita

                                                A. Sardi

                                                Sampun kapacak ing Djaka Lodang

Sabtu Pahing, 26 Desember 1988