BEBAS MABURA

BEBAS MABURA

Aku mung sedrema dititpi

Aku mung tinanggenah ngopeni

Aku mung winates nyrati

Ora duwe sedya ndarbeni

Aku ora kuwawa nggendholi

Aku ora duwe wibawa nguwasani

Aku ora wenang nggandhuli

Mung wenang nguri-uri

Bebas mabura

Egarna lar-larmu nyabrang samodra

Tembusen mega ing ngangkasa

Nganti kasil nemokake korining swarga

Bebas ngumbaraa

Ndlajah sajembaring donya

Tanpa ngenal titi mangsa

Nganti lega sakabehing rasa

Bebas

Bablas

Nebas

Lepas

(Aku jejering wong tuwa

Ora bisa apa-apa

Mung bisa nyangoni donga

Muga nir ing sambekala

                                                      

Aku mung ngglenggena

Pasrah jiwa raga

Marang kersaning Dewa

Muga kowe bisa nemu rasa)

                                    A. Sardi