KABAR SAKA DESA

KABAR SAKA DESA

Le …. nDhuk …

Aja takon piye kabare desa

Aja takon saiki lagi panen apa

Mangertia …

Lemah sawah saiki kabeh bubrah

Tanduran lan tetuwuhan saiki wis owah

Pari diganti wesi

Galengan diganti dalan

Suket alang-alang ilang dadi pepalang

Le …. nDhuk …..

Wis ra sah bali desa maneh

Wurung ra wurung

Lakumu bakal kesandhung

Atimu bakal keduwung

Uripmu bakal nglenthung

Mrangguli palemahan sawah saiki wis owah

Dadi gedhong magrong-magrong pomahan

Le …. nDhuk ….

Aja takon papan dunungan pangon

Apa maneh napak tilas papan anggonku padha peplayon

Jembaring lemah saiki kabeh wis pepayon

Uripku wae kaya-kaya wis ora entuk panggon

Le … nDhuk ….

Aku tulungana

Nggolek papan kanggo nurokake raga

Kang saiki wis tuwa lan kari nunggu wektune teka

:apa ya kudu muspra ?

                                                            A. Sardi