SEWU DINA

SEWU DINA

(gurit kanggo swargi Bapak)

Pak … !

Ora krasa, ora nyana

Sewu dina Bapak nglelana

Ninggal simbok, anak, putu, putu lan mantu

Pak … !

Pirsanana ….

Simbok, anak, putu, buyut lan mantumu

Padha sedheku nyisihake wektu

Ninggal playu nutup napsu

Nedya lunguh sedheku

Mesu cipta ngeningake ndriya

Nyenyuwun marang Hyang Maha Kuwasa

Muga kersaa paring aboring pepadhang

Tindake Bapak

Manggih raharjo

Diapura kabeh kaluputan lan dosa

Kabukakna korining swarga

Pak … !

Rasa kapang iki nglambrang

Mabur mumbul ing awang-awang

Kepengin sesandhingan karo Bapak

Kepengin crita:

Yen Simbok wis tuwa lan kabotan sangga

Yen anak-anakmu kasil mujudake pangimpenmu

Yen putu-putumu kasil anggone sinau

Yen buyut-buyutmu durung pana praupamu

Yen mantu-mantumu njurung laku

Pak … !

Tapak sikilmu isih cetha ing plataran

Daya kringetmu isih tumetes ing njogan

Kidung dongamu isih cetha ngumandhang

Simbok, anak-anakmu, putu-putumu, buyut-buyutmu lan mantu-mantumu

Isih butuh panyaruwe lan pituduhmu

Pak … !

Simbok, anak-anakmu, putu-putumu, buyut-buyutmu, mantu-mantumu

Ora bakal lali lan nglari

Nedya mujudake pangimpi

Kang nate Bapak ajari

Pak … !

Dawa donga pamuji iki

Muga Gusti kersa anampi

Sembah lan bekti

Bapak kalenggahake sesandhingan karo para suci

Ngraosake gesang langgeng ing swargi.

Amin.

                                                                                          A. Sardi