TEKAN KAPAN WAE AKU KUDU SABAR

TEKAN KAPAN WAE AKU KUDU SABAR

Aku mung sedrema dititipi

Ora ndarbeni

Apa maneh nguwasani

Aku mung sedrema ngrumat

Ora ngudi mupangat

Apa maneh drajad lan pangkat

            Wiji unggul iki dipercayakake marang aku

            Wis dakupayakake amrih tuwuh sae lan dhewasa

            Kanthi ngetog daya

            Kanthi meres jiwa

Ewa semono

Yen dirasa kurang panarima

Yen malah nggawe cuwa lan gela

Aku nedya masrahake marang sing nitipake

            Embuh tekan gumantine mangsa kapan

            Embuh dadine nuwuhake wiji kabungahan apa kabegjan

            Aku tetep nduwe wektu sabar

            Aku tetep ngayahi dhawuh timbalan

Sabarku tan bakal winates

Atiku ora bakal tumpes lan pepes

Nadyan tumiba ing urip apes

Nadyan nganti titiwancine pepesthen.

                                                                        A. Sardi